Golden Software аўтаматызавала ''Мінскаблгаз''
Мінская кампанія Golden Software паведаміла пра паспяховае завяршэнне маштабнага ўкаранення карпарацыйнай інфармацыйнай сістэмы. Гаворка ідзе пра аўтаматызацыю бухгалтарскага, складскога і вытворчага ўліку УП ''Мінскаблгаз'', структурнага падраздзялення беларускага канцэрна па паліве і газіфікацыі "Белтопгаз".
Усяго прадпрыемства ўключае шаснаццаць структурных падраздзяленняў, размешчаных у сталіцы і раённых цэнтрах Мінскай вобласці. Агульная колькасць працоўных месцаў склала блізу трохсот, што дзейнічаюць у рамках адзінай, тэрытарыяльна-размеркаванай базы дадзеных, для падтрымання якой была створана адмысловая ўтыліта асінхроннай рэплікацыі. Перадача рэплік можа ўжыццяўляцца як па каналах сувязі, так і з дапамогай кожнага прыдатнага носьбіта інфармацыі. У выніку ўкаранення сістэмы час атрымання кансалідаванай справаздачнасці на прадпрыемстве зменшыўся з аднаго месяца да аднаго дня.
Сістэма распрацавана на базе тэхналагічнай платформы "Гедымін" з выкарыстаннем сэрвэра баз дадзеных з адкрытым зыходным кодам Firebird.
Сяргей ДЗМІТРЫЕЎ
Кампутарныя Весткі
26.08.2006